Regisseur

 

Gschetzti Bsucher vom Freilichttheater

"Über sich sälber ä paar Zile z'schribe isch gar nid so ifach. Scho gar nid, we me grad gar nid unbedingt mues im Vordergrund stah.

Scho als 10-jehrige Bueb het mi dr Vater nachem gröbschte Höje als Statterbueb uf Latreye gschickt. Nach dr Schuel hani d'Lehr als Zimmermaa gmacht u ir RS z' Brugg hani chönne erfahre was ächti Kameradschaft isch. Ds grosse Los hani i mim Läbe zoge, won'i ds Vroni, mi grossi Liebi, endlich ha chönne hürate. Mit dr Zyt sin'es drei Buebe u obe druf no äs Miitschi gschenkt worde.

 

Ja u de ds Theatere, ja äbä, dä Virus hani scho bi de Schueltheater u speter bi de Alpegruessjodler, dank üsem gschetzte Lehrer, Bratschi Peter, verwütscht. Bi de Stück "Burebrot" u "Dr Wittlig" hani als 10- u 12-jehrige dörfe mitspiele. Speter als füürige Liebhaber, Buur guet u bös u obedruf als Falschmünzer im Stück "Frymann" bini uf dr Theaterbühni aktiv gsi. Uf Zuerede vo Bratschi Peter hii, hani ab 1985 "Chüjerliid" d' Regie übernoh. Uf ds Mal hets mi packt u i ha sälber agfange Theaterstück schribe u se de mit mine Spielerinne u Spieler mit Erfolg dörfe zum Beschtä gä. Viel bini Sache ga aluege u ga brichte mit de Lüt, so dass i de i mine Theaterstück ke Seich verzellä. Nume hurti zwü, drü Bispiel: d' Stoumuur im Gamchi, ds Drüländereck Basel oder i ds Wallis zum ne Buur, wo wäg em Rinderwahnsinn acht Chüeh het müesse la abtue.

So, jtz isch aber gnue mit plagiere. Äs grosses Mersi mire Familie, wo mi geng ume tuet unterstütze. Weni albä uf ihri Frage nid grad sofort Antwort gibe, de merke si, dass i ume iis i Gedanke ir Theaterwält, bim ne nöie Stück, bi. Dank o a miner langjehrige Theaterspielerinne u Spieler wo ging das bracht hii, so wie igs ha wölle ha. U de o Mersi a euch langjehrige u tröie Theaterbsuecher.

Jtz Schluss, mir ga derhinder u sägä "härzlech Willkomme", dä Summer, hie bi üs uf dr Aeschiallmi."

 

Chrigel Däpp sen.

Autor, Regisseur